呢排同工們嘅分享都有回應一下現時疫情或者社會發生嘅事情，從而作出一些提醒、分享或者反省。我又引用一下近兩日係網上見到好多人討論停課時如何協助子女進行網上學習(係我間唔中Home Office既日子裡面，我都要教侄女做功課)，對家中有年幼子女既家長們真係十分吃力，但老師們要預備教材作網上教學都確實唔係一件容易嘅事。唔知大家有無把握呢啲時間去增值自己呢？定掛住係喺呢啲時侯走左去追翻啲未睇晒嘅劇，睇翻啲未有時間睇嘅戲呢？

03年嘅沙士我都仲係一個初中生，除左淨係記得當年停聚會時助導會打黎祈禱，會寄屬靈書比小羊睇之外，最深刻既開始有翻聚會既日子但仍要戴住口罩參加聚會，但導師們好有趣咁設計左唔同咀型嘅貼紙，比大家貼係口罩外面，令到戴住口罩搞到好唔舒服嘅感覺，被呢一種有趣同歡樂蓋過左。

前人們都好樂意用時間去為群體學啲野，又或者都好樂意將所學所識嘅野去造就同建立群體，好成為我今日嘅借鏡，由細到大，我同有弟兄姊妹分享過，我嘅目標或者叫做一個小夢想，就係要做個旅遊巴司機，希望整家去旅行時可以慳翻啲BOOK旅遊巴嘅錢；因為細個覺得無咩叻，希望做到呢個職業時，可以對個家有啲小貢獻。

或者係咁，想對仰望之家/群體有啲小貢獻，就成為左我一路成長嘅小目標。而係呢個過程裡面，我發現原來我得到嘅比我想貢獻嘅多出N倍。以下呢啲技能都係細細個係教會學識：開CELL綁汽球、BBQ透爐、運用針線整CELL旗(對會著校服係學校打波嘅男孩子黎講，真係救過我幾次命XD)、煮野食等等，細過學完呢啲對我生活有幫助嘅不同技能之外，到大個甚至乎連我搵食嘅技能都係因為以前助導嘅關顧下先有機會去學到(將來有機會又可以同大家分享下)。出到黎做野更發現：唔係細個做過家刊排版，我未必識喺工作上整啲教學嘅文件、唔係做過PPT，我未必識咁多功能教人整Present，係家事奉上學習運用到嘅WORDPRESS(整家網工具)、Google From等等更曾經幫我順利完成幾個工作上嘅難題。到最近期同同工試用唔同嘅視像軟件/APP比大家維持團契生活，估唔到係面對Home Office嘅日子，係工作上又能夠大派用場；而係O2O嘅團契更學識左直播同唔同嘅剪片技巧(可能第時可以做Youtuber :P)。

呢啲一點一滴嘅累積造就到今天的我。
「萬軍之耶和華說：你們要將當納的十分之一全然送入倉庫，使我家有糧，以此試試我，是否為你們敞開天上的窗戶，傾福與你們，甚至無處可容。」
‭‭(瑪拉基書‬ ‭3:10)
你肯為上帝擺上十分之一，上帝比翻你嘅一定唔止十分九。承邀大家係呢段時間把握光陰更追求靈命進深外，亦可以搵啲野去學，增值自己。我自己成日都好遲開始，成日到要用先去搵GOOGLE，與其等到要用先黎學，不如預備更好嘅自己比上帝使用啦～！

打咗好長篇添，埋尾送隻歌比大家啦～話說每年仰望之家嘅主題曲我都好鍾意，好感謝作曲填詞嘅人好帶到主題信訊出黎，用嘅字眼好激勵到我～但太舊又怕大家唔識，太新又成日唱，所以揀首近代的主題曲同大家分享。

《仰望強盛新一頁 – 2015仰望主題曲》
是祢為我願掛十架上拯救，讓我罪過被祢大愛盡抹清。完全的愛帶著新氣象。
立志在世為使命竭力擺上，突破自我願獻奉接續理想。
決意放開世務，順服跟主方向。前往普天下向萬民宣講真理。
神永眷顧這土地，靠著神去力拼，仰望強盛、興起。
(政導師：步履雖然艱難，但每步盡見主恩！):P
攜手開創新一頁，心勇毅迎向新挑戰。聖殿你我用愛營建；
強勢對抗誘惑試煉。承擔天國、奔跑窄路，這世代縱變遷，
傳揚神大愛堅守聖潔。同步向著前，忠於主力戰！

深願我地每一個都係呢段日子停課不停學，停了聚會卻不停熱心，預備自己嘅生命，喺呢個時代，無論面對個人、家庭、群體或係社會上都能夠被主使用，能夠開創新的一頁。

主內
財仔